हिन्द टीवी – मराठी
मुंबई महानगरपालिका निवडणुकांच्या अनुषंगाने शिवसेनेच्या मुंबईतील सर्व खासदार, आमदार आणि प्रमुख पदाधिकाऱ्यांची विशेष बैठक गुरुवारी मुंबईतील रामटेक बंगल्यावर पार पडली.
नुकत्याच पार पडलेल्या विधानसभा निवडणुकीत पक्षाला मिळालेल्या यशाबद्दल सर्व नवनिर्वाचित आमदार, पदाधिकारी तसेच कार्यकर्त्यांचे याप्रसंगी विशेष कौतुक केले. आगामी मुंबई महानगरपालिकेची निवडणुक महायुती म्हणून सक्षमपणे लढून विजयी होण्यासाठी सज्ज होण्याचे आवाहन देखील यासमयी केले.
गेल्या अडीच वर्षात राज्य शासनाने घेतलेले लोककल्याणकारी निर्णय, मुंबईत गतीमान केलेले मेट्रो, कोस्टल मार्ग, एमटीएचएल असे लोकोपयोगी पायाभूत सुविधा प्रकल्प, खड्डेमुक्त रस्ते, आरोग्य सुविधा, मुंबईतील सुशोभीकरण, नवीन रुग्णालये, कोळीवाड्यांचा केलेला विकास, बाळासाहेब ठाकरे आपला दवाखाना असे निर्णय सर्वसामान्य लोकांपर्यंत पोहचवावे तसेच विधानसभा निवडणुकीत मिळालेल्या यशाने हुरळून न जाता अधिक ताकतीने पक्ष भक्कम करून महापालिका निवडणुकीला सामोरे जाण्यासाठी सर्वांनी सज्ज व्हावे असे आवाहन केले.
यावेळी शिवसेनेचे दिवंगत विभागप्रमुख विजय दिवार आणि ठाणे येथील शिवसेनेचे माजी जिल्हाप्रमुख रघुनाथ मोरे यांना शिवसेना पक्षाच्या वतीने श्रद्धांजली अर्पण करण्यात आली.
यावेळी शिवसेना नेते रामदास कदम, आनंदराव अडसूळ, महिला नेत्या मीनाताई कांबळी, खासदार डॉ.श्रीकांत शिंदे, खासदार नरेश म्हस्के, खासदार रवींद्र वायकर, खासदार मिलिंद देवरा, आमदार दीपक केसरकर, माजी खासदार राहुल शेवाळे, शिवसेना प्रवक्ते संजय निरूपम तसेच शिवसेनेचे सर्व सहकारी आमदार आणि प्रमुख पदाधिकारी उपस्थित होते.